وەزیری دەرەوەی ئێران، حوسێن ئەمیر عەبدوللاهیان رایگەیاند کە بۆ زیندووکردنەوەی رێککەوتنی ئەتۆمی و گەیشتن بە رێککەوتنی کۆتایی دەبێت سەرجەم لایەنەکان “پێداگری و سووربوونی خۆیان” بخەنەڕوو.
بەپێی ماڵپەڕی وەزارەتی دەرەوەی ئێران، عەبدوللاهیان و نوێنەری باڵای یەکێتیی ئەورووپا لە سیاسەتی دەرەکی و کاروباری ئاسایش، جۆزێپ بۆرێل لە میانی پەیوەندییەکی تەلەفۆنیدا هەڵسەنگاندنیان بۆ دانوستانەکانی ڤیەننا کە کۆتایی هاتووە، ئاەنجامداوە.
عەبدوللاهیان، گوتی: “شاندی دانوستکاری ئێران بۆ گەیشتن بە رێککەوتن بە ئیرادە و جیدییەتەوە بەشدارییان لە کۆبوونەوەکانی ڤیەننا کردووە. بیرۆکەی بونیاتنەرانەیان بۆ چارەسەرکردنی ئەو کێشانەی کە ماون خستووەتەڕوو. چاوەڕوانیمان ئەوەیە کە سەرجەم لایەنەکان بۆ گەیشتن بە دەقی کۆتایی پێداگری و سووربوونیان بخەنەڕوو”.
وەزیری دەرەوەی ئێران، بەهۆی هەوڵەکانیەوە بە ستایشەوە باسی بۆرێل-ی کرد و گوتی: “رێککەوتنی کۆتایی، دەبێت دەوڵەتی ئێران ماف و بەرژەوەندییەکانی دەستەبەر بکات و گەرەنتی ئەوە بەدەست بهێنێت کە سزاکان بەشێوەیەکی کاریگەر و سەقامگیر هەڵدەگیرێن”.
نوێنەری باڵای یەکێتیی ئەورووپا لە سیاسەتی دەرەکی و کاروباری ئاسایش، جۆزێپ بۆرێل لە گوتارەکەیدا ئاماژەی بەوە کرد کە لە دوایین دانوستانەکانی ڤیەننادا پێشکەوتنێکی رێژەیی بەدەستهاتووە.
سەرچاوە: https://aburi.news/
لینکی تلیگرام: https://t.me/hawalaburi
رێککەوتنی ئەتۆمی ئێران
